Tertawa Sejenak

Mari udan hawane adhem. Cak Sur njaluk digawekno kopi cik isok melek. Ning Ya langsung nggawekno kopi kenthel ambek tela godhog. Mantep. Kopi ambek tela didokok nang meja makan. “Cik rodok adhem,” jare Cak Sur ambek leyeh-leyeh nang ngarep tivi. Tibakno Cak Sur ambek Ning Ya bablas keturon.
Ketok sepi, tekok ndhukur pyan krungu glodhag-glodhag. “Cepet, I, mumpung sing duwe omah turu,” bisike Pendik. Gayane persis maling nang film. Mlakune themek-themek koyok Tom & Jery. Mari nglebokno HP, jam tangan, mas-masan, ambek dhompet, arek loro nontok onok kopi. Pendik nyruput setengah gelas.

“Enak, adhem-adhem dicepaki kopi,” jare Pendik.
“Iyo uenak telane,” jare Pi'i mangan tela godhog. Kabeh dientekno.
Mari ngono arek loro munggah maneh nang pyan. Gurung sampek metu tekok gentheng, Cak Sur nglilir, kate ngombe kopi. “Lho, kok karek separo? Koen ombe ta?” jare Cak Sur. Mesthi ae Ning Ya gedheg wong pancen gak doyan kopi. “Telane yo amblas?”

Cak Sur gumun. Mosok nang njero omah onok wewe gombel doyan tela? Mosok kuntilanak sing doyan melek bengi kudu ngopi? Mesthi onok sing gak beres. Bareng weruh HP, jam tangan, mas-masan, ambek tutup gelas gak onok, wah… mesthi maling.

Nang ndhukur pyan, Pendik pringas-pringis. Mari ngombe kopi rasane kate pipis gak isok diempet. Tapi mosok pipis nang pyan. Mari ngono tes, tes, tes…. Lho udane wis mari kok lagek bocor? Pi'i sing kakehen mangan tela yo mulat-mulet. Wetenge krasa mules kate ngentut. Pi'i gak isok ngempet, dhuuuut….

Cak Sur kuaget. Mosok suarane tekek malih nge-bas ngono. Opo nang ndhukur tekek kramas sampek netes kabeh. Bareng bolak-balik dhat-dhut-dhat-dhut, Cak Sur mbengok. “Sopo nang dhukur? Tekek ta?”
“Iyo, Cak!” Dhuuut… krucuk-krucuk… dhuuut…. Gak kesuwen Cak Sur mbengoki tangga-tanggane. “Onok tekek ngentut. Tuluuung!”